Baisakhi ka Mela

Baisakhi ka Mela
rang birange paridhano me
utsah aur umang liye
mahilayen,bachhe va purush.
jashna manate apne parishram ka
dekh kar rang,kheth khalihano ka
saadhan apne jeevikoparjan ka
khushiyon ke indradhanush sa
baisakhi ka mela
wahin ek gubbarey wala
laal,neele,peeley gubbarey liye
khada ek aur
baisakhi ke sahare
santulan banaye
baisakhi ke mele me
bachhon ko gubbarey bechkar
apni bhukh ka rang badalne ke liye
pyaas ki gehrayi kam karne ke liye
baisakhi ke sahare
jeevikoparjan ka prabandh karne ke prayaas mey
dukhon ki jholi taangey
bachhon ko khushiyon baantta ek aadmi
baisakhi ke mele me
baisakhi ke sahare.